Connect with us

Ekonomi

Zëvendësministrat dhe deputetët do të paguhen edhe pas përfundimit të mandatit

Published

on

GorenjeKosova

Kryeministri i Kosovës, Ramush Haradinaj, të premten e javës së kaluar në mbledhjen e 111-të të Qeverisë ka dhënë dorëheqje nga ky post, për shkak të një ftese nga Gjykata Speciale.

Por vetëm një ditë para se Haradinaj të jepte dorëheqje, ai kishte marrë vendim që të emëronte ish-komandantin e FSK-së, Kadri Kastrati si zëvendësministër i Mbrojtjes, si dhe Myzeje Selmani si zëvendësministre e Bujqësisë, Pylltarisë dhe Zhvillimit Rural.

Me këto emërime, numri i zëvendësministrave të Qeverisë Haradinaj arrin në mbi 80.

KESCO

Pra, edhe pse Qeveria Haradinaj është në dorëheqje, zëvendësministrat do të vazhdojnë të marrin pagën e tyre, edhe për gjashtë muaj pas përfundimit të mandatit të tyre.

Ata, së paku sipas Ligjit për Paga në Sektorin Publik do të paguhen edhe pas përfundimit të mandatit, nëse nuk realizojnë asnjë të hyrë nga buxheti i shtetit.

Me 40 vota, deputetët kaluan amandamentin i cili i shpërblen me pagë kalimtare zëvendësministrat e Qeverisë, duke ua mundësuar atyre të shpërblehen me 70 për qind të pagës për gjashtë muaj edhe pas përfundimit të mandatit.

“Funksionari publik: zëvendësministri i cili pas përfundimit të mandatit nuk realizon asnjë të hyrë nga buxheti i shtetit, ka të drejtën e kompensimit kalimtar prej gjashtë muaj në vlerë prej 70 për qind të pagës bazë të fundit, në institucionin në të cilin ka bartur funksionin”, thuhet në këtë amendament.

Sipas vendimit të Qeverisë së Kosovës të 20 dhjetorit të 2017-së, një zëvendësministër është paguar në vlerën prej 1,150 euro, kur pas përfundimit të mandatit ata do të marrin hiç më pak se 800 euro për periudhën e paraparë sipas Ligjit.

Përveç zëvendësministrave, pagë të plotë për një vit do të marrin edhe deputetet e Kosovës.

Haradinaj përveç vendosjes së taksës prej 100 për qind ndaj produkteve serbe dhe boshnjake, shndërrimit të FSK-së në ushtri, ai do të mbahet mend si kryeministri me kabinetin më të madh të ministrave dhe zëvendësministrave. /KlinaPress/